Khaliifa Yaxye oo ah feeryahan da’ yar ah oo Kenya u dhashay ayaa isku diyaarinaya tartan caalami ah oo uu ku matalayo Soomaaliya oo ay dhalasheeda qaatay. Feeryahan oo u safan jiray kooxda feerka ee Nayroobi ayaa in muddo ah tababar ku qaadanayay isla magaalada Nairobi.
Khaliifa ayaa horay wacdaro uga dhigay tartammo uu ku galay gudaha Kenya. Wuxuu tartan maxalli ah ku matalay kooxda Dowladda Hoose ee Nairobi (NCC) kaas oo uu kaalinta kowaad ka galay waxa uuna tartankaasi ka dhacay Jericho lumumba social hall taariikhda markay ahayd 12-kii bishii Maarso sannadkii 2022.
Markaas ka dib wuxuu matalay magaalada Nairobi isagoo ka hor tagay feeryahanno ka kala yimid dhammaan gobollada Kenya, wuxuuna ka galay kaalinta labaad. Tartankaas ayaa waxaa uu ka dhacay Magaalada Thika ee Ismaamulka Kiambu taariikhdu markay ahayd 17-kii bishii Maarso ee 2022.
Khaliifa Yaxye waxa uu sanadkii 2005 ku dhashay xaafadaha isku raranta magaalada Nairobi ee Kibra, isla xaafaddaas ayuuna kusoo barbaaray.
“Waxaa isoo koriyey hal waalid oo hooyaday ah taasna waxay sababtay inaan ciyaalka darbi jiifka ah ku biiro markaan ahaa fasalka 4aad,” ayuu yiri Khaliifa oo la hadlay BBC Somali.
Waxa uu intaas ku daray in uu nolosha darbijiifnimada uu ku noqday qof adag, oo dagaal badan, halkaas oo uu kula kulmay macalin Kenyan ah oo carruurta darbijiifka ah u tababara feerka.
Wuxuu sheegay inuu wax barashada u goyn jiray mararka qaar, illaa uu ku biiray carruurta waddooyinka ku hoyda ee aan haysan daryeelka waalidnimo maadaama uusan aabihiis la joogin.
“Markii aan ka baxay fasalka 8-aad nolosha oo dhan ayaa is bedeshay, waxaan noqday derbi jiif waxaan xataa isticmaali jiray daroogo, ka dib hooyaday ayaa i geysay meel dhaqan celis ah halkaas oo aan dib ugusoo kabtay,” ayuu yiri.
Xagay kasoo bilaabatay taariikhdiisa feerka?
Khaliifa ayaa BBC-da u sheegay inuu jeclaystay ciyaaraha feerka ka dib markii tababarihiisii ugu horreeyay oo waddada kasoo qabtay uu geeyay meel lagu taba baro da’ yarta xiisaysa feerka. Tababarahaas oo lagu magacaabo Omondi.
“Wuxuu i geeyey meel lagu taba baro dhalinta feerka jecel, waxaana ka daawan jiray meel daaqad ah,” ayuu yiri khaliifa oo sheegay in uu xiligaas ahaa 11 jir.
Markii hore Khaliifa ma aanu fahansanayn in feerku uu yahay xirfad shaqo amaba wax micno weyn leh waxaanu u ciyaari jiray si iska madadaalo ah sida dhalinyarta kubbadda ciyaarta ay u ciyaaraan oo kale. Balse sida uu sheegay markii uu dhammeeyay waxbarashada dugsiga sare ayuu mar labaad ku soo laabtay feerka isagoo markan si gaar ah u xiisaynaya.
“Markii aan dhammeeyay fasalka ugu dambeeyay ee dugsiga sare ayaan ogaaday inay jiraan kooxo kala duwan oo ka kala socda dalka sida kooxda feerka ee ciidamada difaaca dalka iyo kooxo badan oo kale oo ay ka mid yihiin tan booliska iyo kooxda feerka qaran ee Kenya,” ayuu yiri.
Sidoo kale waxa uu sheegay in uu ogaaday inay jiraan tartamo, halkaasna uu ka helay xiiso dheeraad ah iyo fikirka ah inuu u ciyaaro feerka xirfad ahaan.
Isagoo hadalkiisa sii wata ayuu intaas kusii daray in uu ka qeyb gali jiray tartamo ka billowday meel hoose.
Ugu horreyn waxa uu ka ciyaari jiray Kibra oo ah halka uu kasoo billaabay tartamada feerka, ka dib Nairobi ayuu kaalinta kowaad ka galay isagoo matalaya kooxda ka socotay waaxda bilicda caasimadda Nairobi (NCC), markii dambena tartankii feeryahannada dalka oo dhan loo dhigay ayuu kaalinta labaad ka galay, halkaas oo dawladaha hoose ay ku tartamayeen, xilligaas oo isaguna uu matalayay Nairobi oo dhan.
Kusoo biiritaankiisii xiriirka feerka Soomaaliya
Inkastoo Khalifa uu yahay ciyaartoy ka tirsan xiriirka feerka Soomaaliya hadana wuxuu tababar ahaan uga ciyaaraa kulammo ka dhaca gudaha Kenya.
Waxa uu Khaliifa sheegay in uu jecleystay inuu Soomaaliya ku matalo caalamka inkastoo uu u dhashay Kenya heer fiicanna uga gaaray xirfadda feerka.
“Maadaama uu aabahey kasoo jeedo Soomaaliya, waan ku faanaa Soomaaliya waxaan waligay jeclaa inaan barto dadka iyo meesha uu aabbehey kasoo jeedo, marka fikirka ah inaan matalayo Soomaaliya ayaa ah aniga oo doonayey inaan fuliyo Soomaalinimadii aabbeheey iyo inaan matalo dalkay Soomaaliya ee aan ku faano,” ayuu yiri.
Khaliifa oo hooyadiis ay ka soo jeeddo mid ka mid ah bulshooyinka Kenya ayaan ku soo dhex barbaarin dad Soomaali ah.
Maadaama uu yaraantiisii ku soo koray xaafad aysan Soomaalidu degin uma suurtagelin in uu barto afka Soomaaliga oo ilaa hadda uu erayo oo kooban keliya ka yaqaanno.
Khaliifa ayaan weydiinnay sababta uu Kenya u matali waayay, waxa uuna ku jawaabay:
“Run ahaantii ma aysan iga codsan inaan matalo, hal mar baan ugu dhawaa oo ahayd mar is reebreeb la ciyaarayey oo kuwa soo baxa ay ka qayb galayeen tartan ka dhacayey dalka Uganda halkaas oo hal qof oo kali ah la qaadanayey, haddii laba qof la qaadanayo qofka labaad aniga ayuu noqon lahaa maadaama aan kaalinta labaad ka galay.”
Tartamada caalamiga ah
Koox feerayanno ah oo ka kooban ilaa shan ciyaaryahan oo ka socda xidhiidhka feerka Soomaaliya oo Khliifa uu kamid yahay ayaa ka qayb gali doona tartan ka dhici doona dalka Tanzania bisha 3-aad ee sannadkan, sida uu noo xaqiijiyay xidhiidhka Feerka Soomaaliya.
Khaliifa ayaa ku tartami doona feerka miisaanka fudud ee 51-ka kiilo.
Mar uu faallo ka bixinayey rajadiisa uu tartanka ka qabo wuxuu yiri, “Waxaan qabaa rajo weyn, aad ayaan u tababartaa aadna waan u dadaalaa, ciyaaro fiicanna waan soo bandhigaa, ma ogi inaad daawatay muuqaaladayda feerka iyo in kale”.
Source : BBC News
